මගේ කොම්පියුටර් ඉතිහාසය

කස්ටිය කොහොමද ඉතින්? අද නම් මගේ කොම්පියුටර් ඉතිහාසය ගැන ලියන්නයි හිතුවේ. ඉතිහාසය කිව්වට එක්දාස් නවසිය බර ගණන් වලට යන්නෑ. මගේ කොම්පියුටර් ඉතිහාසය අවු 4යි. මම කොම්පියුටරයක් මුලින්ම දැක්කේ 7 වසරේ ඉන්නකොට ඒ 1999. අපේ දහම් පාසලට අයියා කෙනෙක් කොම්පියුටරයක් ගෙනල්ලා Jurassic Park ෆිල්ම් එක පෙන්නුවා. එතකොට නිකන් මැජික් වගේ. පස්සේ ඔය කොම්පියුටර් ගැන තිබුණු පොත් පත්තර එකතු කළා වගේ මතකයි. ඊට පස්සේ කොම්පියුටර් ඉගෙන ගන්න කියල හිතාගෙන ටෙක් ශ්‍රි ලංකා එකට ගියා. පොඩි කෝස් එකකට ඒ දවස්වල රු 15000 ක් ද කොහෙද ඉල්ලුවා. ආසාව අත්හැරගෙන ගෙදර ආවා.

O/L ඉවර වෙලා ගෙදර ඉන්න කොට කම්මැලි කමට විජය පරිගණක සගරාව ගත්තා. ඔන්න ආයෙත් පිස්සුව වැඩි වුනා. A/L කරන්න ඉස්කෝලේ යනකොට මටත් කොම්පියුටරයක් ලැබුණා. ඒක AMD 1.1GHz එකක් 256MB DDR, 40GB IDE HDD, DVD රොම් එකකුත් තිබ්බා. මම ගොඩක් දේවල් ඉගෙන ගත්තේ ඒ කොම්පියුටරයෙන් එතකොට මම වින්ඩෝස් දාන්න එහෙම දන්නෑ. එක දවසක් මේක වැඩ කරන්නේ නැතුව Win XP යි Win 2000 දාන්න රු 1500 ක් ගත්තා. ඊට පස්සෙ මම ම වින්ඩෝස් දාන්න ඉගෙන ගත්තා. BIOS අප්ඩේට් කරන්න ගිහිල්ලා කොම්පියුටරය Finish වුනා. ආයෙත් මාස 3 කට විතර පස්සේ Motherboard එකකුයි Pentium 4 processor යි දාලා කොම්පියුටරේ හදා ගත්තා. ටික දවසකට පස්සේ සල්ලි හදිස්සියකට මොනිටරේ තියාගෙන ඉතුරු සේරම කොම්පියුටර් කෑලි ටික විකුණන්න වුනා. (ගත්තු එකා මොනිටරේ එපා කිව්වනේ)

(මගේ දුප්පත් මැසිම)

2007 අන්තිම හරියෙදි ආයෙත් මැසික් හදාගත්තා. ඒක තමයි දැනටත් පාවිච්චි කරන්නේ. Pentium Dual core 1.60GHz, 2GB DDR2, 250GB/160GB HDD, DVD RW, Onboard VGA . ගිය මාසේ LCD මොනිටරයක් ගත්තා. මේ මැසිම නම් නැතිවෙන්න Over clock කරලා තියෙන්නේ. CPU, Chipset, Memory වෝල්ටේජ් පාවා වැඩි කරලයි තියෙන්නේ. Cooling Fan න්ම 5 ක් තියෙනවා. කවදාවත් මේකේ කේස් එක නම් වහල නෑ. මම සාමාන්‍යයෙන් ගේම් play කරනවා. ඒත් මට VGA කාඩ් එකක් නම් නෑ. ඕනෙ වෙනකොට කාගෙන් හරි ඉල්ලාගෙන එනවා. හැමදාම යාළුවන්ට ඇණයක් වෙන්න බෑනේ.. ඒ නිසා මේ දවස් වල VGA කාඩ් එකක් ගන්න සල්ලි එකතු කරනවා.

කොම්පියුටර් 2ක් පාවිච්චි කළත් OS එක නම් වෙනස් වුනේ නෑ. (ඒ ගැන කණගාටු විය යුතුයි) සුපුරුදු පරිදි වින්ඩෝස් හොර කොපි. දැනටත් XP & 7. වයිරස් ගාඩ් තුන හතරක් දැම්මත් මට නම් මේක වෛරස් වලින් බේර ගන්න නම් බෑ. මාස 3 – 4 සැරයක් ෆෝමැට් එකක් ෂුවර්. බිලොග් ලියන්න කියවන්න ආවට පස්සෙ තමයි මම FOSS ගැන වැඩි විස්තර දැන ගත්තේ. දැන් FOSS වලට මාරු වෙන්න පොඩ් කැමැත්තක් තියෙනවා. බලමුකෝ ඉස්සරහට. මේක තමයි මගේ කොම්පියුටර් ඉතිහාසය

CFL බල්බ් අළුත්වැඩියාව

කස්ටිය කොහොමද ඉතින්? පිච්චුනු CFL බල්බ් ආයෙත් හදා ගන්න හැටි දැනගන්න කස්ටිය කැමතියි වගේ. මේක ඇවිල්ලා සරල දෙයක් අටුව කඩා පුටුව හැදීමක් වෙන්නත් පුළුවන්. හැබැයි පිච්චුනු බල්බ් 3 ක් වත් හොයා ගන්න ඕනේ. එතකොට අඩුම වශයෙන් 1 බල්බ් එකක් වත් අනිවා හදාගන්න පුළුවන්. CFL බල්බ් එකක් පිච්චුනොත් කස්ටිය මොකද කරන්නේ...? කෙලින්ම කුණු ගොඩට. ඒත් දැන් බල්බ් පිච්චුනාම විසි කරන්න එපා. බල්බ් දෙක තුනක් තියෙනව නම් සේරම බල්බ් ටික එකට මික්ස් කරලා එකක් වත් හදා ගන්න පුළුවන්. ම‍ට නම් කවුරුත් හම්බවෙලා නෑ මේ විදියට බල්බ් හදන . මේ බල්බ් හදන එක මම මුලින්ම කළේ 10 වසරේ ඉන්න කොට. කවුරුත් මට කියල දුන්නේ නම් නෑ. මම ම අත්හදා බැලුවා. ආ.. බඩු වැඩ. මේ විදියට මම දැන් බල්බ් 50 කට වඩා හදලා ඇති. එක එකාගේ බල්බ් හිටන් හදන්න වෙනවනේ...

මේකට අවශ‍්‍ය වෙන්නේ පොඩි බඩු ටිකක් CFL බල්බ් දෙක තුනක්, මල්ටි මීටරයක්, බවුත් එකක්, ඊයම් ටිකක්, පොඩි ඉස්කුරුප්පු නියනක්, සේෆ්ටි ග්ලාස් එකක් (Safety 1st )

මල්ටිමීටරයක් නැත්නම් පොඩි වයර් කෑලි දෙකකුයි LED බල්බ් එකකුයි බැටරි දෙකකුයි හොයා ගන්න.මම මේක බොහොම සරලව ලියන්නයි උත්සාහ කරන්නේ. CFL බල්බ් එකේ විදුරු බට සෙටි එකට කියන නමක් නම් මම දන්නෑ.

පිය‍වර 1 : හොයා ගත්තු පිච්චුනු බල්බ් 3 ගලව ගන්න. බලන්න බල්බ් එකේ කෑලි තුනක් තියෙනවා. විදුරු කොටස, Electronic චොක් එක, හෝල්ඩරයට සවිවන කොටස (1 රූපය) හෝල්ඩරයට සවිවන කප් එකේ ඇතුල් පැත්ත බලන්න. එක කළු පැහැගැන්වී ඇත්නම් බොහො විට Electronic චෝක් එක දැවී ගොස් ඇති බවට අනුමාන කළ හැක.

පියවර 2 : බලන්න දැල්වෙන වීදුරැ කොටසට Electronic චෝක් එක සවිවී ඇත්තේ වයර් 4 කින් ප්‍රවේසමෙන් එම වයර් 4 කපා විදුරු කොටස වෙන් කරගන්න. (2 රූපය ) (බවුත් එක බාවිතා කිරීමෙන් ගලවා ගත හැකි නම් වඩා හොදය.)

පියවර 3 : මල්ටි මීටරය ගෙන එය Ω (ප්‍රතිරෝධය) දක්වන ලෙස සකසා ගන්න(3 රූප‍ය). විදුරු කොටසේ ඇති වයර් 4 සම්බන්ධ වන්නේ වයර් 2 බැගින්වීදුරු බට දෙකකටයි (4රූපය) එක විදුරු බටයකට සම්බන්ධ වී ඇති වයර් 2 ක් ගෙන එය මල්ටි මීටරයෙන් පරික්ෂෘ කරන්න. එම විදුරු බටය තුල ඇති දගරය පිලිස්සී නැත්නම් මල්ටිමීටරයේ එය දක්වයි (කටු මල්ටිමීටරයක් නම් කට්ට ගමන් කරයි. ඩිජිටල් මල්ටිමීටරයක් නම් 0.00 දක්වයි). ඉහත ආකාරයටම අනෙක් විදුරු බටයේ ඇති වයර් දෙකත් පරීක්ෂා කරගන්න. විදුරු බට දෙක තුලම ඇති දගර වැඩ කරයි නම් එම සම්පුර්ණ වීදුරු කොටසම වැඩ කරයි. එය නැවත බාවිතා කළ හැක. එක දගරයක් හෝ වැඩ නොකරයි නම් සම්පූර්ණ විදුරු කොටසම බාවිතා කර නොහැක. (වැඩ නොකරනවා නම් තවත් බල්බයක් පරීක්ෂා කරන්න) මල්ටිමීටරයක් නැත්නම් වයර් L.E.D බල්බය හා බැටරි බාවිතා කර විදුරු බටය තුල ඇති දගරය පරීක්ෂා කරගන්න.

පියවර 4 : ඉහත පරික්ෂා කරගත් වැඩකරන විදුරු කොටස වෙනම තබා ගන්න. වෙනත් බල්බයක් ගෙන ඉහත ආකාරයට එහිද වීදුරු කොටස වෙන්කර Electronic චොක් එක සහිත‍ කොටස ලබාගන්න. දැන් පරික්ෂා කරගත් වැඩකරන විදුරු කොටස ඉහත ගලවාගත් දෙවන බල්බයේ Electronic චෝක් එකට පාස්සා ගන්න (5 රූපය). දෙවන බල්බයේ චෝක් එක වැඩකරනවා නම් බල්බය දැල්විය යුතුය. නොදැල්වේ නම් තුන්වන බල්බයේ Electronic චෝක් එක සවිකර බලන්න. අනිවා බල්බය වැඩ කළ යුතුයි(6 රූපය).

ඉතින් ඔහොම තමයි මම බල්බි හදන්නේ... සමහර කස්ටිය නම් කියයි මූට පිස්සු කියලා. හික්... සමහර තැන්වල පොඩ්ඩක් අපැහැදිලියි වගේ. බොහොම අමාරුවෙන් මෙහෙම වත් ලියා ගත්තේ. වැඩක් වෙයි කියල හිතෙනව නම් නිකං ඉන්න වෙ‍ලාවකට කරල බලන්න. ෂුවර් එකටම වැඩ කරනවා. ප්‍රශ්න තියෙනව නම් අහන්න. චෝක් එක පරීක්ෂා කිරීමට විදියක් නම් මම දන්නේ නැත. (පාස්සන වැඩ කරන කොට Safety ග්ලාස් පාව්ච්චි කරන්න)

මමත් windows 7 බෑවනේ

ඔන්න මමත් වින්ඩෝස් 7 බෑවනේ. පහුගිය මාසේ මාරම ට්‍රයි එකක් දුන්නේ මේක බාගන්න. ඩයලොග් HSDPA වලට පිංසිද්ධ වෙන්න 3 පාරක්ම වැඩේ අතරමග නතර වුනා. පස්සේ වැඩේ අල්ලලා දාල නිකං හිටියා. අපේ ගයන්ත මට Windows 7 DVD එකක් දෙන්න හැදුවත් කම්මැලි කමත් වැඩ වගයක් තිබුණු නිසාත් ඒක ගන්න යන්න බැරි වුනා. කොහොම වුනත් මම ගයන්තට ස්තූති කරනවා DVD එකක් දෙන්න ඉදිරිපත් වුනාට. ඊයේ උදේම ඉතින් ඩයලොග් වලින්ම මේක බාගත්තා. හෆෝයි පැය 3ක් විතර ගියා. බාපුගමන්ම දැම්මා මැසිමට. අපරාදේ කියන්න බෑ ලස්සනට ඉන්ස්ටෝල් වුනා. build 7000 එකට වඩා පෙනුමින් නම් වැඩි වෙනසක් නෑ.

අළුත් වෝල් පේපර් වගයක් තිබ්බා. පස්සේ සුපුරුදු පරිදි මගේ යාළු මාළුවෙක් ගෙන් 9500GT VGA කාඩ් එකක් ඉල්ලගෙන ඇවිල්ලා ඒකත් හයිකළෘ. දැම්මා Crysis Warhead මේකේ මම බාගයයි play කරලා තිබ්බේ. පැය 5 ක් විතර ගියා මුල ඉදලම play කරන්න. බැරිම තැන පොඩි file එකක් edit කරලා හොර වැඩකුත් කළා. God මෝඩ්ම දාගත්තේ නෑ. ගේම් play කරන කොට වත් වෙන වැඩක් කරනකොට වත් එක පාරාක්වත් 7 ජනේලේ crash වුනේ නම් නෑ. ජනෙල් කතා ඉවරයි...

* * *

ගිය සතියේ මම ගියානේ SLT එකට ADSL ගන්න. SLT එකේ ඉදලා අපේ ගෙදරට 8km තියෙනවා කියලා මුං දෙන්න බෑම කියනවනේ. (එක පාරක් දුර වැඩි වුනත් ‍‍‍ දෙන්නම් කිව්වා) අපෝයි. පස්සේ කියලා කියලා යාන්තං Password/username ඉල්ලා ගත්තා. චෙක් කරලා වැඩ කරනවා නම් දෙන්නම් කියලා කිව්වා, ඒත් දැන් සතියක් ගියා තාම චෙක් කරන්න ආවේ නෑනේ. සල්ලි ගත්තෙත් නෑ. රවුටරයක් ගන්නත් එපා කිව්වා නේ. බලමුකෝ ADSL වැඩ කරයිද කියලා.

අද පොස්ට් එකනම් ටිකක් අපිලිවෙළයි. සොරි වෙන්න ඕනේ. කස්ටියට පිච්චිනු CFL බල්බ් හදන හැටි කියලා දෙන්න ද? හරිම ලේසියි. ඕනේ නම් කියන්න මම ලියන්නම්. හෆෝයි ටයිප් කරලා අත රිදෙනවා.

විභාගේ ඉවරයි

කස්ටිය කොහොමද ඉතින්..? පහුගිය දවස් ටිකේම පොඩි exam එකකට සෙට් වෙලා හිටියානේ. යන්තං ඇති මලකරදරේ ඉවර වුනා. හෆෝයි... පුදුම සහනයක් තියෙන්නේ. පහුගිය දවස් වල හරියට බ්ලොග් ලියන්නත් බැරි වුනා. ලියන්න නම් පොඩි පොඩි දේවල් ටිකක් තියෙනවා. ලියන්නංකෝ ඉස්සරහට. පහුගිය දවස් වල අතපසු වුනු වැඩ ගොඩක් තියෙනව. සේරටම කලින් හොදට නිදාගන්න ඕනේ. කලින් සති 2 දිම නිදාගන්න කොට්‍ පාන්දර 1-2 වෙලා. exam එක ඉවර වුනත් ඊයෙත් නිදාගන්න කොට 2 ද කොහෙද, මැච් එක ‍බැලුවා නොවැ. අපරාදේ කියන්න බෑ කස්ටිය දින්නා. බලමුකෝ Final එක.

මදුරුවෝ මදුරුවෝ හැම තැනම

කස්ටිය කොහොමද ඉතින්..? මේ දවස් වල එකසිය ගානට ඩෙංගු බෝවෙනවනේ. හපෝයි.... මෙන්න අපේ පැත්තටත් ‍චෙක් කරන උන් ඇවිල්ලා. වතුර පිරුණු පොල්කටිටක් වත් අහු වුනොත් සොරිම තමා. එක්කෝ 25000 යි නැත්නම් හිරේ. මොනව කරන්නද? මුන් කොහොම හරි බලන්නේ සල්ලි කඩාගන්න විදියක්. අපේ ගෙදර වත්තත් කැළේ වැවිලා, ගන්න දෙයක් නෑ. ඹන්න ඊයේ උදේම මම වත්ත සුද්ද කිරීමේ මෙහෙයුමට බැස්සා. හොද වෙලාවට අපේ ගෙදර තණකොළ කපන මැසිමක් තියෙනවා. කැපුවා කැපුවා ඉවරයක් නෑ. අපෝයි උදේ 8 ඉදලා හ‍වස 3 වෙනකම් කැපුවත් තවත් ඉතුරුයි. තණාකොළ කපන කොට විසිවෙන ගල් කෑලි වැදිලා කකුල් වලයි අතෙයි තැන් 4 - 5 ක් හොදටම තුවාල වුනා. හැබැයි ටින් කෑලි යෝගට් කෝප්ප ‍වගේ දේවල් ගොඩක් හම්බ වුනා ඇත්තටම ඒ ටින් කෑලි වල වතුර පිරිලා. කොහොම කෙහොම හරි හමිබ වුනු ටින් බෙලෙක්ක, ප්ලාස්ටික්/යෝගට් කෝප්ප ටික බ්ලාස් කරා. බලන්ඩකෝ ඉතින් මෙව්වර දවසක් අපිත් ඩෙංගුවාට සහාය දිලානේ. ඉක්මනටම ඉතුරු ටික කපන්න වෙලාවක් හොයාගන්න ඕනෙ. රු 25000 ක් කියන්නේ සෙල්ලංද?

කස්ටිය ඉතින් තම තමන්ගේ ගෙවලුත් සුද්ද කරානම් හොදයි නේද? නොදැනම පොඩ්ඩ පොඩ්ඩ හරි අපිත් ඩෙංගුවාට සහාය දෙනවා.

අවවාදයයි - පර්චස් 30-40 කට වඩා වැඩි ඉඩම් ගැනීමෙන් වලකින්න

මල් පෝච්චියක් ඇතුලේ කොම්පියුටරයක්...???

මෙන්න E පෝච්චියක් හම්බවුනා. ඇත්තටම මේක පෝච්චි කොම්පියුටරයක්. මෙම පෝච්චි (හෝ කළ) කොම්පියුටරය ECS සමාගම විසින් නිර්මාණය කරන ලද්දක්. Intel Atom සකසනය පාදක කරගත් මෙම පෝච්චි කොම්පියුටරය අමුතම ආරක පරිගණකයක්

මෙහි Intel Atom N230 Processor එකක් ද නවතම nVidia Ion chipset එකක් ද අඩංගුය. සුපිරි high quality චිත්‍රපට අද්දැකීමක් විද ගැනීමට Blu-ray Disc drive එකක්ද ECS සමාගම විසින් මෙම පෝච්චි කොම්පියුටරයට ඇතුලත් කර තිබෙනවා

(පින්තූර + විස්තර මෙතනින්)

ප.ලි

මෙන්න පොච්චි කොමිපියුටරේ තවත් පින්තූර ලැබුනා. හෆෝයි මේකට මල් දාන්න බෑ. හික් හික්.....

පින්තූර

81 වෙනි වරටත් පැවැත් වූ රාගම වල්පොල පොසොන් පෙරහැර

ඩෙංකුටු තා...ලෙට බෙර ගහලා...

උඩරට නැටුමට පණ පොවලා....
දළ ඇතුපිට කරඩුව තියලා....//
පෙරහැර එන රග දුර ඉදලා...//

81 වෙනි වරටත් පැවැත්වුනු රාගම වල්පොල පොසොන් පෙරහැර ඊයේ (06) රාත්‍රියේ පැවැත් වුනා. ඊයේ රෑ 8.30 ට විතර පෙරහැර යන පාරට ගිහිල්ලා මම ෆොටෝ ටිකක් ගත්තා (ටිකක් කියන්නේ ෆොටෝ 220 ක් විතර) මේ තියෙන්නේ ඒ ෆොටෝ වලින් ටිකක්. සමහර ෆොටෝ වල එළිය වැඩියි/අඩුයි. හොද ඒවා 100ක් විතර තමයි තිබ්බෙ රැ 9.00 විතර පෙරහැර ආවා. ඉවර වෙනකොට 10.30 ත් පහුවෙලා. එතනම බත් දන්සැලකුත් තිබුණා. හෙන පෝළිම. රැ 11.30ට විතර ඒකෙනුත් කාලා ගෙදර එනකොට රැ 12 ත් පහු වෙලා... මෙදා පාර අලි ඇතුන් නම් හරිම අඩුයි 12 ද කොහෙද හිටියෙ. ගිය පාරනම් 25 කට වැඩිය හිටියා. 50 වෙනි පාරට පෙරහැර තිබුණු අවුරුද්දෙ දී අලි ඇතුන් 50 දෙනෙක් හිටිය කියලා ආරංචියි.

Internet කනෙක්ෂන් එක බේරා ගැනීමට උවමනා නිසා පින්තුර වල resolution එක 3072 x 2304 සිට 800 x 600 ට අඩු කරන ලදී...

උගුඩුවෙක් දෙන වදයක්....

කස්ටිය කොහොමද ඉතින්...මගේ බිලොගය එක තැන පල් වෙනවා...අපෝයි මොනව හරි ලියන්න ඕනෙ...මේ දවස් වල පොඩි exam කට්ටක් තියෙනවා ඒකයි බිලොගය ලිවීම අතපසු වෙන්නේ... මමත් සිංහල බිලොග්කරණ තරගයටත් එකතු වුනා. ඉදිරිපත් වෙන අයටත් මොනවහරි දෙනවද දන්නෑ...ලියන්න විශේෂ දේකුත් නැති එකේ අපේ ගෙදර තියෙන පොඩි දැවෙන ප්‍රශ්නයක් ගැන ලියන්න හිතුවා. මීට අවු 1 1/2 කට විතර කළින් මාර කට්ටක් කාලා ලෝන් පාරක් දාලා සිවිලිම ගහගත්තා. අෆෝයි… හිතුවට වඩා වියදමක් ගියා

මේකයි දැන් කේස් එක මේ ළගකදී ඉදලා සිවිලිමේ උගුඩුවෝ පවුලක් ජීවත් වෙනවා (තව මීයෝ එහෙමත් ඉන්නවා). දෙතුන් දෙනෙක් නම් බැරියැ 8 ක් 10 ක් විකර ඉන්නවා. පවුල ප්‍රසාරණය වෙලා පරම්පරාවක් හැදිලද කොහෙද.. මේ උගුඩුවන්ගෙන් මාරම වදයක් තියෙන්නේ. වෙලාවකට මුන් ටික රංඩුත් වෙනවා ඒ වෙලාවට ඉතින් අනිවා සිවිල්න් ශිට් 1 ක් 2 ක් බිම. ගොඩක් වෙලාවට ශිට් බිම වැටෙන කොට කැඩෙනවා. එතකොට අලුත් ශිට් කෑල්ලක් ක‍ඩෙන් ගෙනත් දාන්න ඕනේ. සල්ලි තමයි. කොයි වෙලේ සිවිලින් ශිට් එකක් ඔලුවට කඩා වැටෙයිද කියන සැකයෙන් තමයි මම කල් ගෙවන්නේ. රෑට නිකං හොල්මන් මන්දිරේකට ගියා වගේ. එහෙන් අඩි සද්ද මෙහෙන් අඩි සද්ද උගුඩු පවුල රංඩු වෙනවා කෑගහනවා මෙව්වා දැකල මට පිස්සු හැදෙනවා. අප්‍රසන්නම දේ තමයි මුන් සිවිලිමේ මුත්‍රා කිරීම. එතකොට සිවිලිමේ පැහැය වෙනස් වෙනවා.

අවාසනාවට මට මේ එක උගුඩුවෙක් වත් අහුවුනේ නෑ. අහු උනානම් මම පෙති ගහනවා. උගුඩුවන් ටික බ්ලාස් කර දැමීමට සිවිලිමේ වස තැබිමට අදහසක් ආවත් එය නොකරන්නේ වස කෑ උගුඩුවන්ව සිවිලිමෙන් ඉවත් කිරීමට මට සිදුවන නිසයි. මුන් ටික එලවා දැමීමට වෙනත් ක්‍රමයක් දන්නවා නම් ඉක්මනට කියන්න. නැත්නම් සිවිලිම ගලවා දැමීම අවසාන විසදුමයි. අපෝයි...